O pasado 25 de novembro, desde o noso sindicato de Oficios Varios de CGT en Vigo, sumámonos á xornada de reivindicacións contra a violencia machista que percorreu as rúas de Vigo contra a estrutura sistémica que perpetúa a opresión das mulleres e das disidencias de xénero. A violencia machista non é só física: é psicolóxica, económica, institucional e cultural.
A violencia machista é unha ferramenta do patriarcado para manter o control sobre os corpos e as vidas das mulleres e das persoas LGTBIQ+. Por iso, desde o anarcosindicalismo, entendemos que a loita contra esta violencia debe ser colectiva, autoxestionada e anticapitalista. Non basta con leis que non se cumpren nin con declaracións de intencións: precisamos accións concretas que desmonten as estruturas que sosteñen esta opresión.
Como sindicato, seguiremos impulsando asembleas, talleres de autodefensa e campañas de sensibilización nos nosos espazos de traballo e nos barrios. A loita contra a violencia machista é parte inseparable da loita pola emancipación da clase traballadora.
Non nos conformamos con días de denuncia: queremos un mundo onde a violencia machista sexa imposible.
Non hai paz sen xustiza feminista!
Comentarios